ذكرى رحيلك !. لـ عبدالعزيز الرحيل

ذكرى رحيلك ! - عبدالعزيز الرحيل

وين إنت ياللي خاليِ // دوُنك الدار :
القلب خالي وَ العنا .. بالمشاوير !
وينك تشوف الحال . صاير على نار :
‏الحال بعدك ممتلي .. بالمخاسير !
حالي بعد غيبتك قاسي // وَمنهار
حالي .. بعد غيبتك ما به تباشير !
كل شي قاسي صار وش فيه ماصار :
حتّى اللذي ماصار ممكن ترى يصير !
ياما سهرت الليل واحكي له شصار :
ياما شِرقت شمسي وانا جفني سهير !
 
صابر على دمعي وعلى كل الاضرار :
حتّى انكسر غصني وانا توّي صغير !
كل مانسيتك ارجع اذكرك .. واحتار :
مانساك لو ذيك السماء تجحد الطير !
‏دامك رحلت وانتهى .. معك مشوار :
للحين باقي وُسط قلبي // مشاوير !
ماكنت احسب ( البعد ) بالحيل جبّار :
لين إبتعدت ومات صوت العصافير !
‏حتى المدينه والضواحي والاشجار :
وذاك المكان اللي جمعنا على خير !
كل ماأمر تسألني تقول وش صار :
واصد عنهم مالي اليوُم // تبرير !
من رحت عني ( ابتدا ) معك مشوار :
ذيك الدّموع اللي توقّف .. طوُابير !
صفّوا على ذاك الجفن مثل الاحرار :
واقفوا وخلوني وُانا ماني // بخير !
 
ماعاد باقي ( بغيبتك ) لغز وأسرار :
ماعاد باقي غير شكوى المعاذير !
دفتر غياب وحبر أنزف به أشعار :
وُذكرى رحيلك فيها كل . التعابير !
من غبت عني صار للحرف مقدار :
من كثر ماكتب صار عندي جماهير !
ماعاد ( قلبي ) قاوي اليوم . زوّار :
من غبت قفّلته وُلابه .. مسايير !
‏تعال وانسى صاحبي . كل ماصار :
مابيننا أكبر من معاتب . وتأخير !
تعال راضي ( لاتفكر ) بالاعذار !
للحين باقي لك معزه .. / وتقدير !
ولو مالك ( بقلبي ) معزه . ومقدار :
ماكانت دموعي تهاجر // طوابير !
وان كنت ماتبغى تجيني . ومحتار :
أقدر اعيش بغيبتك فاقد / الخير !
راضي بحكم الله وراضي بالاقدار :
وُأبدعي الله رغم ماصار/ وُيصير !

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.