ياسعود عاوني على القاف ياسعود
روّض شواردها على الطرق هيّه
انضد لنا من وافر المزن منضود
وردّ الحروف اللي علينا معيّه
سقها لمن حبه جمح كل منقود
يرقى سنود ولايتعداه زيّه
يرسل على حزم الغلا فوق ويزود
وأستبشرت ريضانها في برديّه
مسيلها فيض على الصدر ويعود
مافيه عرقٍ كود تسمع دويّه
لعيون من يفرح بها الحظ ويجود
بيارق ن رفّت بعز وحميّه
لعيون من يزها لها الطيب والعود
(أمي)وهي قر العيون ورضيّه
إبحضنها ياما تهنيت برقود
وبكفها الحاني تهدد عليّه
كم ليلةٍ تسهرعن النوم وتحود
وكم ليلةٍ دعواتها لي خفيه
يالله طلبتك يافرج كل مضهود
يالله طلبتك ياجزيل العطيّه
تقسم لها ياربنا الخير وتزود
وتجعل جزاها بالجنان العليّه
حنا لها ظهر وذراعين وعضود
وحنا لها ظل ومقيل ن وفيّه
لعيونها ماردّنا الصعب والكود
ولا ردنا لفح السموم ولضيّه
ماصغتها في ناقش الكف وزنود
ولا قلتها ياصاحبي في هويّه
شديتها للي لها القلب مشدود
ولغيرها ماعنده القلب نيّه
ياسعود لاتغفل عن القاف وتنود
فزعاتكم ياسعود دايم سخيّه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.