لحظـــات عمــــري

في خاطري ؛ لحظاتْ .. بالعمر ؛ مَرَّت
وأنا ؛ على لحظاتْ بالعمرْ ، مَرَّيت

أما ؛ لنا فيها.. مْراتٍ ؛ تمرَّت
وإلا ؛ لها فينا.. مراتْ ؛ وتمرَّيت

وإلا ؛ عيونْ البدر فيني ؛ توَرت
وأنا ؛ عيون الشمس فيها ؛ توريت

أشوفها ؛ قدام .. عيني ؛ تعَرَّت
وتشوفني ؛ قدام ..عينه ؛ تعرَّيت

مرات ؛ بي دارت..ومرات ؛ فرَّت
ومرات ؛ يا ما.. درت فيها ؛ وفرَّيت

يا ما ؛ تهادت بي.. ويا ما ؛ إستشرَّت
أموت ؛ فيها حَيْ ..وأحيا لها ؛ ميت

زريت في هاذي .. وهاذي ؛ تزرَّت
وهاذي ؛ تمناني .. وهذي ، تمنيت

وهاذي؛ تمادت .. وأذعنت واَسْتجرَّت
وهاذي؛ سبقت.. بلهفتي ؛ واستجريت

من حسرةٍ؛ في وقتها.. حيل ؛ سرَّت
زمانْ ؛ كانت (ليت) تعمر لنا ؛ البيت

يا ما ؛ تحريته .. ويا ما ؛ تحرَّت
ويا ما ؛ تراوت لي.. ويا ما ؛ تراويت

مراتْ ؛ عن نسمةْ.. هوايهْ ؛ تذرَّت
ومراتْ ؛ عن نسمةْ.. هواها ؛ تذرَّيت

وإياي؛ ما رأيٍ عليه ؛ استقرَّت
وأنا ؛ وإياها.. لحظةٍ ؛ ما استقريت

يا ما ؛ من المرات .. مني ؛ تبرَّت
ويا ما ؛ من المرات.. منها ؛ تبرَّيت

راحت ؛ على ما بين.. فرت ؛ وكرَّت
يا ما ، تمنيته .. ويا ما ، تناسيت

واقفيت واقفت واسفرت واكفهرَّت
أو إنها حين أقبلَت عنَّها أقفيت؟

مشاعري في نارها حيل حرَّت
تجسدت فيني.. وفيها تلاشيت

واستدركتني في وصاله وغرَّت
وأنا على فالي..من الوصل غرَّيت

وياما من الونات بالويل جرَّت
وأنا من الونات..بالويل جرَّيت

لحظات عمري عمرها ما استمرَّت
وان استمرت فيها أنا ما استمريت

على حلو ميعادها ما تحرَّت
يا ليت ما بالحيل فيها تهقويت

ما كنها إلا (الشَّب) بالعين ذرَّت
اللي لها لحظات عمري ترجيت