لـوحــة حـياتــي

لوحة حياني حالمة وردية
با لفال لولا فالها وش هيه؟!

في ماضيٍ يشهد على حاضرها
أو حاضرٍ يشهد على ماضيِّه

حرة أبية صاغها باريها
في عالم الأحلام رومانسية

فيها معاني سامية أصيلة
الناس فيها ناس لا جنِّيَة

فيهم ضميرٍ حي دايم واعي
بأسمى المبادئ واقف جنديه

فيهم تشوف أسرار ماضي حاضر
تشوفها عيونك وهي منسية

تشوف فيها واقعِ متعارض
متناقضٍ بال كم والكيفية ؟

عوالم تشوفها مجنونة
تعيش حرية بلا حرية!

يسودهم بالظلم ليل حالك
حالة ضياع غايبٍ والية

فيهم شعارات الخزي مرفوعة
لكنها ؛ مع الأسف وهمية

ضياعها ينبيك عن راعيها
ماهيب في صلاحها مرعية

وتشوف في (لوحة حياتي) صحراء
فيها الضما يلهث لنقطة مية

يزمي بها صحراء الضما سرابه
والعج والسموم بالصيفيَّه

فيها نخيلِ خاوية محروقة
وجبالها صداها يرجع زيه

وجمالها تشوفها (خكاري)
تخكرنت مع (عالم الخكرية)

من حين فيها (البوش) جاب (علوجه)
ما هيب شرقية ولا غربية

والله ، يا لوحة حياتي فيها
تبدو لنا مناظر مخفية

بأطلال سالف عصرها ناسيها
وأمجادها في صفحة مطوية

ما بين (أجا) الصامد و(سلمى) حدِّه
أبطال ، قصة حبهم محكيِّه

فيها ل(حاتم طيء) (موقد ناره)
تَهدي ضيوف الليلة الشتوية

و(قيس بن شمر) الزعيم القاضي
أشاع طيب السلم للبرية

و(عَدي حاتم) صاحب الرسولِ
وأمثال (زيد الخير) بالخيرية

و(إمرئ القيسِ) يخاطب (ناقةً)
بالشعر ، وهو: في حمى (الطائية)

قال: أنها ترعى بأمان وراحة
مسراحها (الحائل) من (القُريَّة)

و(سلمى) بها نشوف قبر الفارس
(عنتر زمانه) ب (النعي) قبلية

و(رمان) يا ما في شعابه ياما
تاريخ ، فيه شعابها ثرية

فيها (المهلهل أبو ليلى سالم)
و(حرب البسوس) الثأر والحمية

وآثار (أبو زيد الهلالي) فيها
و(البير) يومه ينقتل خويه

و(عيسى بن أجود طيء) راع (تْوَارن)
رافع (لواء شمر) ب (أم صهية)

في (جو أجا ) وش كثر رائع جوه
و(صهوة أجا) من طبعها محمية

عوى بها (بعيجان) (راع الصفراء)
في (كون عصفر) وانكسر عاديه

و(قفار) فيها أطلال مجدٍ ماضي
شرقي (أجا) في ظله العصرية

(ستة قرون) (جبال شمر) فيها
(شيوخ آل بعَيِّر) شاعمينٍ ضيَّه

(غياض بن بقار) هذا قصره
و(كريم سبلا) راعي الصينية

(خيال الشعبتين) (زيزوم شمر)
تتليه فوق (أم المخاريز) أبيَّه

ودارت عليهم فتنة مشئومة
بين (آل بعَيِّر) ربعه الدونيه

يسودهم حكم (النظام العرفي)
قبل ظهور (الدعوة النجدية)

ألي بها (ال سعود) سادوا فينا
معطين للشريعة (الشرعية)

تباركوا بإمارة (أخوان نورة)
و(أخوان نوره) ذكرهم يا حية

ب(إمارة ال رشيد) في زمنها
(برزان حائل) سايد طارية

(جنايزٍ) أرواحهم مجلوبة
عند الملاقا يسبقون الهية

رغم المعارك ما انكسر بيرقهم
مهما النتايج جت عليهم سيِّة

الين شبت فتنة ملعونة
ما بينهم بحروفها المقريِّة

و(لوحة حياتي) لو تمعن فيها
يا ما بها مهاويٍ ممليِّة

فيها وفيها تبي من يفليها
يلقى بها مخابيٍ سريِّة

مني لكم (لوحة حياتي) أهدي
واهديها عنكم (لوحتي) تحية