الشعر من غزْل المشاعر يخيطه
من كان في تفصيل الابيات خياط
ما يقطع بحور القصيد و محيطه
كود الذي في قوة ابيوته افراط
شعرٍ شروكه بالمعاني غويطه
ما مات لو عصره قبل عصر الانباط
هذا ومن جيش الكآبه يحيطه
يرتاح باللي راسه أطول من الغاط
في مرقبٍ يجلى شقاك و يميطه
يشتاق له من شاف بالواقع احباط
سجتْك مع جرد السهال البسيطه
تسوى مجالس كلها إزعاج غلاط
نزّه جنابك عن جناب السقيطه
واتعب على اللي بمثل شرواه تحتاط
يا احتجت يصفط لك بروحه صفيطه
مسطور طيب وبالمواجيب يشتاط
دنياك مع سمح النوايا عبيطه
ما هاط شي من اخبث الناس ينهاط
بصدوفها يا عونة الله سليطه
توجع وهي ما تضرب الخلق بأسواط
منها فطين القلب يحتاط حيطه
من يدرك ان ايام دنياه شعواط
بين الشتاء و الصيف تطوي شريطه
تفرنا و تبدّل اشواط باشواط
واليوم ما معنا نفوسٍ نشيطه
عقب اعتدال اجواء نيسان و شباط
يا قرر الصقار طيّ الخريطه
تبي تقيّض يا اشقر الريش برباط
يما طلوع سهيل يعتق ربيطه
ونصبح بعد راحه مشافيق ونشاط
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.