تمرر لنا الكلمه ولا نقبل التمرير
معي فيزةٍ ذالحين ياللي معك فيزه
نبا نركب اللي شكلها مثل شكل الطير
تفج المزون ولا تعرف التلزّيزه
لها في قفاها محركاتٍ بنوعٍ غير
تبخ اللهب من كنةٍ عقب تهويزه
مضيفاتها في خدمة الراكبين تسير
على قولة المصري : دا كُرسِ وطرابيزه
لها وجهةٍ فالجو سجل لها تقرير
تحت كبتنٍ له وجةٍ قدم تركيزه
نبا ديرةٍ خضره يجي في مطرها خير
جفتها الدهور وكل دربٍ وله جيزه
اليا من نحرنا ديرة الكفر والخنزير
نشوف الصليب معلّقٍ في براويزه
على موترٍ ماعلقو في قفاه سبير
جديدٍ ولا يحتاج شيٍّ لتعزيزه
اليا من بغينا للتماتيك ولا القير
على غاية المنوه يقدّم لتجهيزه
ركبنا على ال BMW وسلفه دير
قطعنا الدروب اللي عزازٍ وتغريزه
معك واحدٍ بالفعل مايلحقه تقصير
تعرفه ولا يحتاج قولٍ لتمييزه
خويٍ على ممشاك ماهو يعكس السير
تشوفه على درب الوفا بان تحفيزه
يولّم معاميله وزودٍ عليها خير
معه شنطةٍ مليانةٍ من بلاليزه
طراة العمر لا شفت للذاكره تصوير
مع كل دربٍ ماجهلنا دهاليزه
سنينٍ تغيّر والبشر تقبل التغيير
ولا غيّرت للناس صورة موناليزه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.