راكب اللي كن لمباتها تقدح شرار
قدح طلقات البلاجيك من قو الرمي
منظر اصطباتها لاوصفته باختصار:
تقل نارٍ في طرفها دلالٍ تحتمي
وارد الرسلان مصفوفةٍ في جال نار
تجذب الانظار عند الامير ابن كمي
شكلها لامن تعدتك في وضح النهار
صعبةٍ من سوط عسّافها تزمي زمي
وبالظلام تقول نجمٍ تحرك بانحدار
في مهمة قصف جنّي وتاديب ادمي
خشمها فوقه علامة تميّز وافتخار
منحني تمثالها تقل مشعاب سلمي
لاقبلت مثل القذيفه وضو الانفجار
شعشعتها عدها تجعل الاعين عمي
المسارات الثلاثه تخليها مسار
والحماس يخلي السايق يقول اقدمي
والجوانب شكلها شكل صالات انتظار
صمموها بالمطارات تصميم اعجمي
في خيالي وصف ديكورها سلّة فخار
تحمل الماس وذهب وسط وردٍ مرتمي
والمراتب تقل اثاثٍ بمكتب مستشار
والمرايا كنها للسحابه تنتمي
تعطي الركّاب فرصه وراحه وانبهار
بالفخامه والسعه مستواها عالمي
لاتساوى الخط والوضع حسب الاختيار
ودك تشغّل حبيّب مع حمود السمي
موتر اهل الارصده والسلاطين الكبار
شكلها ماله حلي واسمها ماله سمي
روز رايز تحمل شعار جوده وابتكار
في زمان العولمه والنظام العولمي
استلمها واحدٍ مايبي ختم وقرار
حر تكفيه الاشاره وكلمه من فمي
يوم فللها وحرّك شويّه واستدار
أحدٍ يقول اركدي واحدٍ يقول اسلمي
روّحت مثل السهم لا يمين ولا يسار
من مدينة سيّد العالمين الهاشمي
في رسالة شكر معها معزه واعتذار
والتحيّه خاتمتها وتوقيع قلمي
لين تلفي دار حرٍ من خيار الحرار
الكريم اللي ماقال اشهدولي ب كرمي
سالم دغيمان ذكره وسيع الانتشار
حيث طيبه كل الايام ماهو موسمي
فعله بيمناه ماجاب فعلٍ مستعار
وافتخر في مدحهم لابن عمي محزمي
من يعاتبني بمدحه نظرته باحتقار
كلمة المغتاب حطيتها تحت اقدمي
تمّت وصلوا على المصطفى سر وجهار
واحدٍ حبّه بقلبي ويجري مع دمي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.