الشعر ..

‏اقلط على جزل المعاني كان تبغاها شعر
وان كان تبغى هزلة الهراج تلقاها معه

خل العناد وشغّل افكارك وركّز واعتبر
عقلك معك ماقول لن ماطاعك الشاعر طعه

الشعر دجالٍ عور ماهو بمهدي منتظر
واشرح لك المقصود كان انك مصمّل تسمعه

لو اربعه تعجبهم ابياتك ويلحقهم ضرر
أصبح قصيدك نكبه وحمّلك وزر الاربعه

على سبيل الشرح لو خليت شرحي مختصر
الشعر لن ماخفّض الشاعر لايمكن يرفعه

إلا قصيدٍ فيه تحذير العباد من الخطر
ينفع جماهيره ومن سواه طبعاً ينفعه

هذي حقيقه واقعيّه ماتبي وجهة نظر
من لا يعد الحق جنّب عنه واحذر تتبعه

الصدق ينجي صاحبه ويبدد اعذار المكر
والكذب يجمع مركز الاعصاب ثم يوزعه

عندي كلامٍ من ذهب مادري حروفٍ من عطر
ماهو كلام اعلام واصحاب القناه تلمّعه

كم شاعرٍ عند الجماهير الغفيره مشتهر
يجوز بكره شهرته باسفل جهنم تدفعه

يشتم ويقذف ويتبجّح ويتهزا بالبشر
لو يستتب الامن مايرتاح لين يزعزعه

دايم قصيده شاطح من اول شطر لاخر شطر
وليانصحته قام يرثع في غبار المعمعه

أغواه شيطانه وصار يشوف شطحاته درر
اللي ما في وجهه حيا مافيه حاجه تردعه

يعمل مع الشيطان مجاني بلا راتب شهر
يرتاح لاشاف البلد عقب التواصل مقطعه

لولا سياج الهدم كان يشوف للبنيان اثر
لكن سياجه يبعده عن الصواب ويمنعه

لو انه اشعر من زهير وعنتره وابن حجر
ولو القصيد الجزل من عهد الطفوله يرضعه

ماعده الا واحدٍ يجني عناقيد الفقر
متوهّقٍ في نفسه اللي بالردا متربّعه

ان كان سموه البحر ماني مسميه البحر
كان البحر وصفه كذا حتى المضيق اسمه سعه

يقضي على جهد التواضع في مشاريع الكبر
ويصمم الراي المخالف حسب رغبة مصنعه

من كبّر اصغار الخطايا شطّب كروت العذر
واصبح مزاجه شرس ويدوّر من الهرج اشنعه

والنوع الاخر صنّفوه الناس تصنيفٍ عور
هو هيكله هيكل غزل بس النوايا مقلعه

متجاوزٍ وصف الظبي والنور الابيض والقمر
ماباقي الا يرسم المخفي ويشرح موضعه

فلمٍ من افلام الخلاعه صوّره ثم انتشر
واصبح يشيل ذنوب كل انسان قام يشجّعه

شعر الغزل ماهو كذا والحب صافي كالنهر
يعني على وضح النقا طاهر وصافيه اروعه

اللي صحيح يحب مايشري لمحبوبه قهر
يغار لو مابان من جسم الغضي غير اصبعه

وانا على ذكر الغلا حبيت اذكّر من حضر
اللي شراك بطيب قلب اشره ولن باعك بعه

كانه وصلك العلم شكراً لك وانا مابغى شكر
يكفيني القا واحدٍ وصله كلامي واقنعه

كنز القناعه مايجيب الا تباشير النصر
والنصر ثوبٍ يكسي المنصور ماحدٍ يخلعه

من خاض حرب المغريات وسل سيفٍ من صبر
حطم سيوفٍ في مساجين الاماني مرثعه

التجربه تظهر لك اشياءٍ مايظهرها دهر
مثل الفراسه يوم تعرف ويش سد الاقنعه

كم هيكلٍ بينه وبينك حاجز وخدعة بصر
الياوصلته وان ساسه طرح وانته تجمعه

أضرب لك الامثال حتى تحصر المعنى حصر
جتك الرسايل من قلمنا والضروف مشمّعه

أرضيّة الملعب لها منظر ومنظرها خضر
لو مانت عارفها قبل يمكن تقول مربّعه

لو القضيه بالشكل واللون واحجام الصور
ان كان من مر الشجر يقول هذي مزرعه

اعرف تعاليم انضباط الجند ياظابط خفر
والا عصاك الجندي الواعي وسمّاك امّعه

المعرفه زاد العقول اللي تجوع مع السفر
واللي يجوع مع السفر ما كل حاجه تشبعه

هذا وتم العلم والساري على حروة فجر
ماعاد باقي غير نور الصبح يبدا مطلعه

أما قنعت بفكرتي والا يجيب الله مطر
ياصاحبي والعلم ماهو لغز حتى ترمعه

الخط خط المطبعه والبيت يحتل السطر
لكن لاتنشد عن المصدر حروف المطبعه

أنشد بنات الفكر يعطنك عن المصدر خبر
أخذ الخبر وان مافهمته في مكانه رجّعه

والخاتمه مسك الختام المسك مع ورد وزهر
صلى الله وسلم على تاج الضمير ومرجعه

اللي كسر شوكة جيوش الشرك في غزوة بدر
الطاهر المختار هو رمز الصواب ومنبعه

عليه اصلّي عد ما صلا عمر وابو بكر
واعداد زينات النجوم اللي تشعشع شعشعه

واعداد صولات الصحابه في ميادين الفخر
واعداد تكبير المرابط مع قذيفة مدفعه

واعداد غرفٍ من بحر واعداد نحتٍ من صخر
واعداد ما هلت هماليال المزون المسرعه