ما قلتي لي قبلتي وين
وانتي في ذاتك تدسي البسمة في كف الخجل
وتفوتي خطوات غربة جد
لحظة رحيل مد الأجل
و انا شان أشوفك في الدرب لوحت للإلفة القبيل
ومشيت معاك لحظت فرح
ممزوجه بإلاحساس أمل
قبلتي وين والألفة في ذات المدي ..
بتنادي ليك بي أعلي صوت
مالي الفراغ والسكة ماليها الوحل
وتغيب اكيد لحظة صفاك
وانا في مداك ..
سارح وراك ..
بنده عليك قبال أصل
لسه الدرب ما اتعودك
لا انتي عودتي القلب
يتشابي ليك والطيف أفل
يا قبلة العشم الفتح
جواي عناوين للفرح
وإحساس مفارق ما وصل
قبلتي وين ..؟
********************
وانا في انتظارك و مشتهيك
في لحظة ما بتحمل غياب
لسه الوعود فرحانة بيك
واشواقنا في مد السراب
مكتوبة في صدر السنين
ايام نضارك ازدهار
واحلام منمقة بالشباب
يافرحة بتقابل حنين
قبلتي وين ..
وانا في رحاب شوفتك هناك
لوحت لي طيف الرهاب
وارتحت في ضل الأماني
الوارفة بين صفحات كتاب
صافيت عيونك في المكان
انا وانتي والريد الزمان
نتلاقي لو تم النصاب
نتلاقي يا ضي العمر
في ليل رصيفو البشريات
ونشوف أمانينا القراب
تغمرنا أحلام السنين
محتفلة بي صورة ملامح الذكري والوعد المجاب
تجمعنا اشواق الحنين
في قبلة العشم البعيد
والسكة بتحدد خطاوي الرجعة للفرح الغياب
١٩/٨/٢٠١٤م
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.