ياالله الا ياالله لولاك لولاك

ياالله الا ياالله لولاك لولاك
ما قامت الدنيا ولا فيك تشكيك

ولولاك ما صلى المصلى ولباك
ولو لاك ما حلت اعقود الشرابيك

حنا عبادك يا اللاهي عبدناك
يا رافع(ن) سبع السموات نرجيك

نرجيك ونحسب عذابك وبلواك
لا تبتلينا كل ابونا بياديك

الخلق خلقك والسوايا سواياك
وكل الاسامي تنتمي في اساميك

اذكرك واطلب رحمتك واترجاك
انت الالة الي عظيمة معانيك

اول معانيك الكواكب والافلاك
والارض ووتاد البسيطة بياديك

انت الذي نطلبك ونعاين اهداك
رحمتك يا رب العباد المماليك

يالادمي لو شفت ما اكثر خطاياك
تخطي ولا تدري وضاعت هقاويك

حاسب وحسب وش بقا لك بدنياك
دنياك لو طالت مع الوقت ترميك

بكرة تموت وتصبح الناس تنعاك
وايامك الي عددت فيك تنعيك

فكر بوقتك والليالي لها اشواك
والشوك لو نامت اعيونك يصحيك

خلك فهيم القلب واحذر من ارياك
وان كان قلبك يا فتى حي ينبيك

هو الدليل اللي يجيبك وينهاك
عن بعض شي وبعض شي يوديك

يلي جعلت الطيب والعز مرقاك
اسمع كلامي من ضميري يناديك

علم(ن) يجيك وطامع(ن) بة لشرواك
ما هوب لوجية الخبول الصعاليك

بنصحك يلي تفعل الخير يمناك
يا لطيب اللي كل جزلة تباريك

يلي علومك واضحة في محياك
يا مشيد(ن) بالطيب عالي مبانيك

راعي النميمة لا تحطة بمبداك
مبداك عنة ابعيد ما هو حراويك

خلة يولي عن طريقك ومعناك
ما هوب كساب النفايل يباريك

راعي النميمة قاطع الوصل فتاك
قلبة حقود ولا يجي منة تبريك

يقعد سوات ابليس ملحد ونماك
وان قام مشكل بين ذولا وذوليك

وليا لقا فرصة مع الناس بلواك
يفرح ليا فتحت جميع الشبابيك

يضحك امامك ويتخير سجاياك
ويقول ما مثلك من الهيك للهيك

وان غبت ما بين الخلايق تعشاك
سبك ونبك لين كثر حكاويك

واصبحت كل(ن) مشتر(ن) عيد فرقاك
وكل العرب في المجتمع ما تدانيك

وراعي التكبر يا فتى الجود زماك
الصدر بارز والشوارب مشاويك

وان شفت زولة قلت فارس بلياك
وسيفة على ارقاب المعادين يشفيك

لو كان ما يارد على العد وياك
لا جا نهار(ن) فية للقوم تعريك

وليا لقا غيرك من الناس خلاك
ما كن لك في عشرتة يوم ناسيك

وان كان خاويته قرب منك واعداك
واصبحت من جنسه بالامراض معديك

راع التكبر ناقص العرف شكاك
شكاك في نفسه وله شكه(ن) فيك

الكبر لله رب الارباب سواك
وانت الضعيف اللي يميتك ويحييك

اعرف مقامك وانتبه واحسب اخطاك
قدام عسرات الليالي توريك

وراع البخل ما هوب يا خي ملفاك
ملفاك من حط الشحم وانشغل فيك

لا جيت بيته ساعه الضيق حياك
يفرح اليا شاف الضيوف المهاليك

رجل(ن) ليا جيته من البعد يرفاك
وان رحت ما قطع حبايل عراويك

رجل(ن) طليق وهو مناتك وسلواك
عن بعض ظيقات النوايب يسليك

خل البخيل يروح عن ذروه امناك
دور طويل اذراع ياخذ ويعطيك

راع البخل لا جيته اقفى وخلاك
ويا سرع خطواته ليا صار لا فيك

تلقاه لا شاف الكرامه تنصاك
وان قام ما رحب بظيفك وعانيك

دخش(ن) دخش ما يحتمي ساعه احماك
حاشا ولا ظني يعزك ويحميك

وتارك فروض الدين حطه بيسراك
وحذرا تحطه يا لشقردي يمانيك

مالك وماله ذا عدو(ن) من اعداك
وقلب(ن) بلا رحمه يشيلك ويرميك

خلك مع المسلم ليا جاك ما جاك
يبقا معك والقلب الابيض يعليك

رجل(ن) على وجهه علامه لدنياك
وفي الاخره يدرك جميع المداريك

وتارك فروض الدين يمشي بالاشراك
ما يذكر الله لو يحبك ويغليك

يوم(ن) معك وايام خالف لممشاك
خاين ولا يقدر يساير مماشيك

قليل دين ولو قرب منك يدهاك
ابعد عن المجرم عسى الله ينجيك

خلك بعيد وحاجتك لا تعداك
حتى تفوز بطاعه الله ويحميك

وناسي معاريف الرياجيل حاشاك
حاشاك تمشي في دروبه ويعميك

مهما عملت ابه المعاريف مغلاك
تعمل بة المعروف والصبح ناسيك

هذي نصيحه والنصيحه لها ادراك
عند الرجال الغانمين المحاكيك

وتم الكلام وتم شطر(ن) على اك
وشطر(ن) بنيته من هجوسي على ايك

وصلاه ربي عد ما ينبت الراك
على رسول(ن) ما يجي فيه تشكيك